సైరా’కు రికార్డు స్థాయిలో టీఆర్పీ.. చిరు దెబ్బకు ప్రభాస్, మహేష్ ఔట్

సైరా’కు రికార్డు స్థాయిలో టీఆర్పీ.. చిరు దెబ్బకు ప్రభాస్, మహేష్ ఔట్

కుర్ర హీరోలు ఎంత మంది వచ్చినా తన ఛరిష్మా ముందు వాళ్లంతా బలాదూర్ అని మెగాస్టార్ చిరంజీవి మరోసారి నిరూపించారు. వెండితెరపైనే కాకుండా బుల్లితెరపై కూడా సత్తా చాటారు. చిరంజీవి హీరోగా ఇటీవల వచ్చిన చారిత్రాత్మక చిత్రం ‘సైరా నరసింహారెడ్డి’. ఈ ఏడాది విడుదలైన సినిమాల్లో అత్యంత భారీ చిత్రం ఇది. చిరంజీవి డ్రీమ్ ప్రాజెక్ట్‌గా ఆయన తనయుడు రామ్ చరణ్ భారీ బడ్జెట్‌తో తెరకెక్కించారు. సురేందర్ రెడ్డి దర్శకత్వం వహించారు.

‘సైరా’కు రికార్డు టీఆర్పీ

తెలుగుతో పాటు హిందీ, తమిళం, మలయాళం, కన్నడ భాషల్లో ఈ చిత్రం విడుదలైన సంగతి తెలిసిందే. అయితే, తెలుగులో ఆడినంత గొప్పగా ఈ చిత్రం మిగిలిన భాషల్లో ఆడలేదు. ముఖ్యంగా తమిళంలో డిజాస్టర్ టాక్ తెచ్చుకుంది. అయితే, ఈ సినిమా తమిళ వర్షన్ శాటిలైట్ రైట్స్‌ను సన్ టీవీ సొంతం చేసుకుంది. డిసెంబర్ 1వ తేదీన తొలిసారి సన్ టీవీలో ఈ చిత్రం ప్రసారమైంది. తమిళనాట వెండితెరపై పెద్దగా రాణించలేకపోయిన ‘సైరా’.. బుల్లితెరపై మాత్రం దూసుకుపోయింది. రికార్డు స్థాయిలో టీఆర్పీని రాబట్టింది.

‘బాహుబలి 2’ని మించి..

తమిళ ఇండస్ట్రీ సమాచారం ప్రకారం ‘సైరా నరసింహారెడ్డి’ తమిళ్ టెలివిజన్ ప్రీమియర్ 15.44 టీఆర్పీని సొంతం చేసుకుంది. అంతేకాదు, తమిళంలో గత వారం అత్యధిక టీఆర్పీ రేటింగ్ పొందిన టాప్ 5 లిస్టులో ‘సైరా’ స్థానం సంపాదించింది. ఇంకో విషయం ఏంటంటే.. ‘బాహుబలి 2’ తమిళ్ టెలివిజన్ ప్రీమియర్‌కు వచ్చిన దానికంటే ‘సైరా’కు వచ్చిన టీఆర్పీ చాలా ఎక్కువ. ప్రభాస్, రానా, అనుష్క, సత్యరాజ్ ప్రధాన పాత్రల్లో దర్శకధీరుడు ఎస్.ఎస్.రాజమౌళి తెరకెక్కించిన విజువల్ వండర్ ‘బాహుబలి 2’ తమిళ వర్షన్ 10.33 టీఆర్పీని అప్పుడు సాధించింది.

చిరు తరవాతే మహేష్, ప్రభాస్

తెలుగు నుంచి తమిళంలోకి అనువాదమై టెలివిజన్ ప్రీమియర్లుగా ప్రసారమైన సినిమాల ఆల్ టైమ్ టాప్ 5 లిస్టులో సైతం ‘సైరా’దే అగ్రస్థానం అని తెలిసింది. ‘సైరా’ రావడానికి ముందు తమిళ టీవీలో సూపర్ స్టార్ మహేష్ బాబుదే పైచేయి. ఆయన హీరోగా వచ్చిన ‘1 నేనొక్కడినే’ తమిళ్ టెలివిజన్ ప్రీమియర్ అప్పట్లో 13.06 టీఆర్పీని సాధించింది. దీని తరవాత స్థానం కూడా మహేష్‌దే. మురుగదాస్ దర్శకత్వంలో వచ్చిన ‘స్పైడర్’ తమిళ్ టెలివిజన్ ప్రీమియర్ 10.4 టీఆర్పీని రాబట్టింది. నాలుగో స్థానం ‘బాహుబలి 2’ది. ఇక 8.3 టీఆర్పీతో ‘బాహుబలి: ది బిగినింగ్’ ఐదో స్థానంలో ఉంది.